Eline Karlsdatter Fladseth

Saman om utviklinga i Vestnes kommune

Om kommuneplanen

Kommuneplanen legg grunnlaget for politiske og administrative val og prioriteringar. Det er i kommuneplanen den lokale, langsiktige politikken blir utforma. Den fortel korleis vi ønsker at kommunen skal utvikle seg på lang sikt og korleis vi skal jobbe for å nå måla.

Gjennom kommuneplanen gir kommunestyret ei tydeleg bestilling om korleis dei ønsker at administrasjonen skal arbeide dei neste fire åra. Ei politisk, tydeleg styring over tid vil bidra til at vi når måla våre for framtida. Ei slik tilnærming er berekraftig for økonomien, for sosiale forhold og for å bevare miljø og sikkerheit.

Planen inneheld også ein arealstrategi som skal leggast til grunn ved revisjon av kommuneplanen sin arealdel og framtidige forslag om regulering og utbygging. Føringar i samfunnsdelen skal vidareførast i arealdelen.

Om plansystemet og oppfølging av planen

Oppfølging av kommuneplanen sin samfunnsdel skal leggast til grunn for kommunen si planlegging og verksemd. Kommuneplanen skal med andre ord vere grunnlaget for arbeidet med fagplanar og all saksbehandling.

Kommuneplanen er også førande for staten og regionale myndigheiter si verksemd i kommunen.

Planen har eit perspektiv på 12 år, men etter kvar valperiode blir behovet for revidering vurdert. Det nye kommunestyret har då moglegheit til å justere kursen. Dette blir avklart i kommunal planstrategi.

Kommuneplanen blir følgt opp gjennom kommuneplanen sin handlingsdel, som er økonomiplanen. Resultatet av oppfølginga av mål i kommuneplanen blir presentert i årsrapporten.

Korleis planar i kommunen heng saman og påverkar kvarandre. Illustrasjon: Vestnes kommune

Om planarbeidet og medverknadsprosessen

I arbeidet med å definere samfunnsmål for Vestnes kommune har vi lagt vekt på å involvere breitt. Dette har vi gjort ved å utfordre politikarar, næringsliv, innbyggarar, organisasjonar og tilsette i kommunen til å komme med innspel til utviklinga av Vestnes- samfunnet. Medverknadsprosessen er lagt ut på kommunen sine heimesider under Ny kommuneplan - Vestnes kommune. Her kan du lese referat frå dialogen og innspela frå møta som er gjennomført. Etter innspelsrunden blei innspela strukturert og drøfta politisk.

Dei tilsette i Vestnes kommune har gitt konstruktive innspel til korleis kommunen som organisasjon skal utvikle og fornye seg framover.

Alle grupper som har delteke i medverknadsprosessen. Innbyggarar generelt, råd og organisasjonar, grupper som krev tilrettelegging, næringslivet, tilsette og politikarane. Illustrasjon: Vestnes kommune

Saman om å nå måla

Frivillig forum 2024 Vestnes kommune

Dersom vi skal nå felles mål for framtida, er det viktig med forankring, deltaking og involvering frå innbyggarane. 

Saman kan innbyggarar, lag og organisasjonar, eldsjeler og næringsliv finne nye og betre løysingar. Gjennom ein open og inkluderande arbeidsprosess vil kommunen få nye idéar og kunnskap om utfordringar og moglegheiter i lokalsamfunnet.

Involvering og medverking i utviklinga av kommunen vil gi innbyggarane ei kjensle av stoltheit over Vestnes kommune. Eigarskap og stoltheit er også viktig for å rekruttere, behalde og få ungdom til å flytte tilbake.

Vestnes mot 2050

Eline Karlsdatter Fladseth

Utviklingstrekk, utfordringar og moglegheiter

Globale, nasjonale, regionale og lokale utfordringar heng saman og påverkar korleis Vestnes kommune må arbeide framover.  Det er fire hovudutfordringar det er viktig at vi løyser i fellesskap dei neste åra. 

• Svak befolkningsutvikling: Mange unge flyttar ut og det blir fødd færre born. Vi må arbeide for å snu utviklinga samstundes som vi førebur oss på at vi kanskje ikkje greier det.
• Kamp om arbeidskrafta: Omsorgsoppgåvene blir fleire, og behovet for arbeidskraft aukar også i privat sektor, men vi blir ikkje fleire i yrkesaktiv alder til å utføre dei.
• Behov for omstilling: Auka spenningar i verda, klima- og naturendringar og avtakande petroleumsaktivitet fører til endringar og forsterkar behovet for å bruke ressursane godt og riktig.
• Framleis god fordeling: Små forskjellar og stabil tilgang på velferdstenester i heile landet må bevarast i møte med omstillingane og ei aldrande befolkning.

Ifølge SSB vil folketalet krympe i 40 % av kommunane fram mot 2050. Byane vil vekse, medan det er liten eller ingen vekst i distrikta. Fram mot 2050 er det venta ein reduksjon i folketalet i Vestnes kommune samtidig som andelen eldre aukar. Dette er ei utvikling som vi må førebu oss på, men som vi samstundes må prøve å snu.
Endra alderssamansetting endrar behovet for tenester og drar opp utgiftene til pensjonar og helse- og omsorgstenester. Samtidig vil skatteinntektene vekse saktare, fordi veksten i antal sysselsette flatar ut. Ser vi fram mot 2050, aukar utfordringane. Vi må lykkast på fleire område for å balansere statens og kommunens utgifter og inntekter: fleire må sysselsettast, eldre må stå lengre i arbeid, og vi må legge til rette for innovasjon og nyskaping. 
Mange norske distriktskommunar prøvar å snu ei negativ befolkningsutvikling. Ifølge Demografiutvalet forutset det å lukkast at ein er klar med gode arealplanar som ikkje er til hinder for at ein raskt kan legge til rette for vekst i næringslivet og for tilflytting når det byr seg moglegheiter for det.

Hit er vi på veg

Tal på personar i yrkesaktiv alder (20-66år) bak kvar pensjonist i Vestnes kommune. Kjelde: SSB Folketal tabell 07459 og Framskrive folkemengd hovudalternativet tabell 14288. Illustrasjon: Vestnes kommune

Skal vi lukkast med å snu utviklinga har vi ei rekke utfordringar vi må gjere noko med for å gjere det meir attraktivt å bu i Vestnes.

Vestnes kommune kjem dårleg ut på fleire levekårsindikatorar, som til dømes psykisk helse, trivsel og utanforskap blant dei unge. Resultata i grunnskulen er svakare enn snittet og fråfallet i vidaregåande skule er høgt. Dette har konsekvensar for helse, tenestebehov og framtidig arbeidsdeltaking.

Det har blitt vanskelegare å skaffe seg bustad i Vestnes. Leigeprisane har gått opp og det er få ledige bustader. Det har også blitt mykje dyrare å kjøpe seg ein bustad fleire stader i kommunen.

Vi står midt i ei klima- og naturkrise, der klimaendringane viser seg i form av ekstremvêr med ekstrem vind, ras og flaum. For å avgrense skadane krev det at vi alle arbeider for å redusere klimagassutslepp og tapet av natur.

Det er krig, både i Europa og Midtausten, og kamp om det geografiske og teknologiske hegemoniet mellom Kina, USA og Russland. Den geopolitiske situasjonen er meir usikker og utrygg enn på lenge. Krigar og klimaendringar vil føre til store folkevandringar. Vestnes har sidan 2022 tatt imot 330 flyktningar frå Ukraina. Det er uvisst kor lenge krigen vil vare, og vi må forvente å ta imot fleire. Arbeidet med å ta imot og integrere flyktningane er ei viktig oppgåve framover.

Digital transformasjon kan gi oss store moglegheiter til å løyse oppgåver meir effektivt og kunne redusere behovet for meir arbeidskraft i framtida. Samstundes er det også ein del utfordringar med den raske utviklinga. Kommunen må arbeide for å utnytte desse moglegheitene på ein offensiv, bevisst og kreativ måte.

Les meir om utfordringsbiletet her:

• Perspektivmeldingen 2024 - Meld. St. 31 (2023–2024) – (regjeringen.no)
• Kunnskapsgrunnlag til regional planstrategi (PDF, 2 MB) (mrfylke.no)
• Diskusjonsgrunnlag - Kommuneplanens samfunssdel 2024-2036 (vestnes.kommune.no) (PDF, 6 MB)

Vestnes kommune

Planlegginga skal fremme berekraftig utvikling

FNs berekraftsmål ligg til grunn for planarbeidet. Berekraftsmåla ser miljø, økonomi og sosial utvikling i samanheng. Måla gir oss ei ramme å jobbe ut ifrå. Dei bind det globale og det lokale saman og inspirerer til innsats og dialog på alle nivå, både tverrfagleg og tverrpolitisk.

Ein ny kommuneplan skal vere med på å ruste oss så godt som mogleg for å løyse utfordringar for framtida. Ved å legge berekraftsmåla til grunn for alle aspekta med den nye kommuneplanen, sørger vi for å ha gode føresetnader for å møte morgondagen.

Bryllupskakemodellen av berekraftsmåla.Kjelde: Hans Græsli - Azote for Stockholm Resilience Centre, Stockholm University CC BY-ND 3.0.

Eline Karlsdatter Fladseth

Visjon

Ein visjon kan definerast som eit bilete av ein framtidig, ønska tilstand. Vestnes kommune sin visjon er «Vestnes - midt i blinken!» Visjonen vår kan sjåast som ein faktisk geografisk fordel og i ein meir overført tyding:

• Den sentrale plasseringa i fylket gjer Vestnes til eit naturleg val både for busetting og nyetablering i næringslivet.
• Det er «midt i blinken» å etablere næring i kommunen. Vestnes kommune er ein aktiv medspelar overfor næringslivet.
• Det er «midt i blinken» å bu og leve i Vestnes med rikt kulturliv og gode tenester som er treffsikre i kvalitet og innhald.
• Vestnes kommune er «midt i blinken» for alle som er glade i natur og friluftsliv. Kommunen legg til rette for eit aktivt friluftsliv med lett tilgjengelege naturområde.
• Vestnes kommune er «midt i blinken» som arbeidsgjevar og er ein serviceinnstilt, løysningsorientert og imøtekomande kommune.

Satsingsområde og mål

Vestnes kommune har valt fire satsingsområde og definert eit hovudmål innanfor kvart satsingsområde. For å arbeide for å nå visjonen og alle hovudmåla har Vestnes kommune definert eit hovudmål for kommunen som organisasjon.

Gode kvardagsliv: Vi har eit inkluderande lokalsamfunn som fremmer trivsel, meistring og god folkehelse i alle fasar i livet.

Verdiskaping og attraktivitet: Vi har eit variert og konkurransedyktig næringsliv og kulturliv som fremmer bulyst og arbeidsdeltaking for alle grupper av befolkninga.

Klima, miljø og beredskap: Vi sikrar trygge lokalsamfunn og eit robust livsgrunnlag ved å ta vare på naturen og dei ressursane og tenestene den gir oss.

Enklare å få seg ein god bustad: Vestnes kommune skal føre ein framtidsretta bustadpolitikk der vi brukar dei flottaste areala vi har til bustader og samarbeider med utbyggjarar for å byggje til ein overkommeleg pris.

Kommunen som organisasjon: Vestnes kommune er ein inkluderande og nyskapande organisasjon med målretta styring.

Zbigniew «Ziggi» Wantuch

Eline Karlsdatter Fladseth

I Vestnes har vi eit levande kulturliv med eit mangfald av lag og organisasjonar. Kulturaktørar frå kommunen vår gjer seg bemerka nasjonalt, og vi har det mest besøkte biblioteket i fylket. Dei kommunale kulturinstitusjonane, som frivilligsentral, kulturskule, bibliotek og ungdomsklubb, har lange tradisjonar for å samarbeide med ideelle lag og organisasjonar for å skape gode tilbod for innbyggarane.

Kultur bind oss saman og gir oss identitet og er ei kjelde til kreativitet, fellesskap og livsglede. Gjennom heile livet har vi behov for å kjenne oss inkludert og å oppleve meistring. Forsking viser at deltaking i kunst- og kulturaktivitetar kan bidra til auka livskvalitet og forbetre mental helse og velvære.

Frivilligheita har ei viktig oppgåve i samfunnet samstundes som den bidreg til inkludering og trivsel. Dette fordi frivillig engasjement handlar om at vi gjer noko aktivt og meiningsfylt saman og at dette i seg sjølv gir god folkehelse. Likevel kan vi oppleve at det er utfordrande å rekruttere stabile ressurspersonar til frivilligheita.

Vestnes kommune har gode føresetnader for eit godt oppvekstmiljø med nærleik til naturen, gode fritidstilbod og eit trygt lokalmiljø. Likevel slit vi, som andre kommunar, med ein del utfordringar blant barn og unge. Dette gjeld spesielt psykiske helseutfordringar, låg trivsel, dårlege skuleresultat og høgt fråfall i vidaregåande skule. I tillegg viser statistikken at mange unge vaksne verken er i skule eller i arbeid. Desse utfordringane krev at vi arbeider med førebygging, meistring og trivsel.

I dag manglar vi helsepersonell, og denne utfordringa vil bli forsterka framover. Vi lever lenger, samstundes som det blir færre i arbeidsdyktig alder til å ta hand om pleietrengande. Utviklinga dreg opp utgiftene til pensjonar og helse- og omsorgstenester. Dette krev mellom anna at vi arbeider med førebygging, og at vi utviklar effektive og gode tenester.

Innspela til kommuneplanen viser at uformelle møteplassar og arenaer for leik, aktivitet og friluftsliv er svært viktig for innbyggarane. Dette er stader som bidreg til auka fysisk aktivitet, kontakt mellom folk og meistringsopplevingar uavhengig av sosial tilhøyrsel og alder. I innspela blir det også peika på at samarbeid er viktig for fellesskap og eit inkluderande lokalsamfunn der born får ein god oppvekst og vaksne trivst. Deltaking i kulturelle aktivitetar bør bli ei reell moglegheit for heile befolkninga, uavhengig av sosioøkonomiske levekår.

Zbigniew «Ziggi» Wantuch

Ziggi

Zbigniew «Ziggi» Wantuch

Vestnes kommune har i dag aktive bygder der det blir skapt store verdiar gjennom næringsaktivitet innan skipsbygging, mekaniske verkstad, landbruk og havbruk. I bygdene har vi eit aktivt kultur- og idrettstilbod basert på frivillig arbeid med mange eldsjeler. Vestnes har over ein lengre periode arbeidd målretta med tettstadsutvikling i samarbeid med Møre og Romsdal fylkeskommune. Dette har gitt oss eit kompakt og attraktivt sentrum med vekst i handel- og servicenæringa. Vidare arbeid med tettstadsutvikling vil styrke kommunen sin attraktivitet.

Vestnes kommune utmerkar seg ved å ha mange arbeidsplassar innan sekundærnæringar. Skipsindustri og relaterte verksemder er den store berebjelken for sysselsettinga. Det er vanskeleg å få tak i kvalifisert arbeidskraft i alle bransjar. Det er forventa at denne utfordringa vil auke.

I Vestnes har vi ein relativt høg del av unge vaksne som verken er i arbeid eller under utdanning. Vi treng all arbeidskraft vi kan få i framtida. Det er derfor viktig at kommune, stat, og næringsliv samarbeider om å få så mange som mogleg ut i arbeidslivet.

Vår plassering i fylket gjer at kommunen kan tilby eit rikt tenestetilbod og ein variert arbeidsmarknad med ei reisetid innanfor 60 minutt. Plasseringa gjer det også mogleg å rekruttere arbeidskraft frå andre kommunar og gjere oss attraktive for ny næringsverksemd. Dette fortrinnet må vi utnytte.

I innspel frå innbyggarar går det tydeleg fram at det er ønske om at det blir etablert uformelle møteplassar der folk kan treffast. Mange peikar på at eit sentrum med eit breitt tilbod av varer og tenester er viktig for busetting og attraktivitet i heile kommunen.

For å sikre busetting er det viktig at ein stadig skapar nye og varierte arbeidsplassar.  Vestnes kommune må arbeide for å få eit omdømme som kan trekke til seg både arbeidskraft og busetting. Vi må synleggjere kva Vestnes kan tilby av arbeidsplassar og fritidsaktivitetar. God infrastruktur og styrka kommunikasjon i regionen er viktig for busetting og næringsliv. Vestnes må få eit renommé som ein kommune med aktivt og inkluderande kultur-, idretts- og friluftsliv, samhald og fellesskap.

Pendling inn og ut av Vestnes kommune per 4.kvartal 2023. Bilete visar at dei største straumane går ut av kommunen til byane Ålesund og Molde. Illustrasjon: MRFylke

Zbigniew «Ziggi» Wantuch

Zbigniew «Ziggi» Wantuch

FN definerer to miljømessige, globale hovudutfordringar: klimaendringar og tap av naturmangfald. I tillegg er den geopolitiske situasjonen meir usikker og utrygg enn på lenge. Dette er komplekse problemstillingar som krev både lokal og global innsats.

Endringar i arealbruk trugar naturmangfaldet. Tap av naturmangfald påverkar økosystema og reduserer naturen si evne til å utføre viktige oppgåver som til dømes opptak og lagring av karbon, handtering av overvatn, klimaregulering og reinsing av luft og vatn. Det er kommunane som har hovudansvaret for arealbruken i Noreg, og slik har vi ei nøkkelrolle i arbeidet for å hindre tap av naturmangfald. Gjennom gode val no kan vi sikre at framtidige generasjonar kan nyte og nytte naturen og leve godt i Vestnes også i framtida.

Framover vil vi oppleve meir ekstremvêr, auka havnivå og endra nedbørsmønster. Det aukar risikoen for ras, flaum og erosjon. Tiltak for klimatilpassing blir viktige for å beskytte både menneske og infrastruktur.

Samtidig som vi må tilpasse oss endringane som kjem, må vi óg redusere klimagassutslepp for å bremse den vidare utviklinga. Alle delar av samfunnet må bidra til å redusere den samla ressursbruken. Samarbeid, teknologi og innovasjon kan bidra til at vi kan få meir ut av mindre både når det gjeld materialar, energi og areal.

Klimaendringar, krig og terror krev at vi har fokus på beredskap. Straumstans og stopp i vassforsyning kan ha store konsekvensar, men også større dataangrep kan vere lammande for eit samfunn. I ein rask digital omstilling har vi ikkje no fullt ut oversikt over konsekvensane fiendtleg bruk av til dømes kunstig intelligens kan føre til framover. Vi må ha gode planar for korleis vi skal handtere ulike hendingar når dei inntreff. I tillegg må vi vere førebudd på å ta imot nye innbyggarar, då både krigar og effektane av klimaendringane vil føre til store migrasjonsstraumar i verda.

Innspela til kommuneplanen viser at det er stor semje blant innbyggarane i kommunen om at naturen er ein av kommunen sine største styrkar. Vi vil bevare nærleiken til sjø og fjell og ta vare på naturmangfaldet. Innbyggarane er også opptekne av å redusere klimagassutslepp gjennom redusert ressursbruk og sirkulær økonomi, men dei etterspør meir kunnskap om korleis dei best kan bidra. Auka lokal matproduksjon og styrking av økologisk landbruk blir sett på som viktig for beredskapen. Innbyggarane vil verne om matjorda og ønsker løysingar som stimulerer til sjølvdyrking og småskalaproduksjon.

Zbigniew «Ziggi» Wantuch

Kommunen er ein politisk organisasjonsom skal løyse eit breitt spekter av oppgåver innanfor ulike fag og ansvarsområde. Kommunen har ansvar for viktige velferdstenester for våre innbyggarar og skal vere ein demokratisk arena for myndigheitsutøving og samfunnsutvikling. Desse oppgåvene må utviklast i takt med endringar i lokalsamfunnet. Det krev at dei tilsette og organisasjonen har evne til å ta til seg ny kunnskap og nye metodar for oppgåveløysing og tenesteutvikling.

I åra som kjem vil hovudutfordringa vere å skaffe tilstrekkeleg arbeidskraft og rett kompetanse. Kommunen må derfor ta del i utviklinga av ny teknologi som kan hjelpe oss å løyse oppgåver på ein betre og meir effektiv måte. Vestnes kommune skal ha eit godt arbeidsmiljø og skape eit omdømme som ein attraktiv arbeidsgivar der tilsette har moglegheit til å utvikle og utfordre seg.
Kommunen har over tid hatt ein stram økonomisk situasjon. Vi må jobbe for å få ein økonomi som gir oss handlingsrom til å utvikle Vestnes- samfunnet og tilby gode tenester til innbyggarane våre.

Dei tilsette har gitt konstruktive innspel til korleis kommunen som organisasjon må utvikle seg framover. I det daglege arbeidet ønsker dei tilsette at verdiane inkluderande og nyskapande skal legge føringar på korleis vi løyser våre oppgåver. I arbeidet med å løyse komplekse oppgåver må vi bli eit lag der vi heile tida utviklar oss saman. Vi må nytte ressursane til dei tilsette og løyse oppgåver i fellesskap. Vi må arbeide for at vi får ein “vi-kultur” med engasjement og stoltheit. Den digitale transformasjonen krev at vi stadig fornyar oss og har evne til å ta til oss ny kunnskap. Vi må våge å tenke nytt for å løyse utfordringane som kjem.

Arealstrategien tek utgangspunkt i mål og strategiar frå samfunnsdelen og er kommunens overordna prinsipp for framtidig arealutvikling. Strategien skal sørge for at kommunens arealbruk er i tråd med nasjonale og regionale føringar og gi kommunen betre politisk styring over arealbruken. Strategien bidreg til å gjere arbeidet med arealdelen meir føreseieleg.
 

Kommuneplanen sine samfunnsmål:

• Vi har eit inkluderande lokalsamfunn som fremmer trivsel, meistring og god folkehelse i alle fasar i livet.
• Vi har eit variert og konkurransedyktig næringsliv og kulturliv som fremmer bulyst og arbeidsdeltaking for alle grupper av befolkninga.
• Vi sikrar trygge lokalsamfunn og eit robust livsgrunnlag ved å ta vare på naturen og dei ressursane og tenestene den gir oss.
• Vi skal føre ein framtidsretta bustadpolitikk der vi brukar dei flottaste areala vi har til bustader og samarbeidar med utbyggjarar for å byggje til ein overkommeleg pris.
   

Nasjonale føringar

• FNs berekraftsmål (FN.no)
• FNs naturavtale (FN.no)
• Nasjonale forventninger til regional og kommunal planlegging 2023-2027 (regjeringen.no)
• Nasjonal jordvernstrategi (regjeringen.no)
• Bærekraftig bruk og bevaring av natur – Norsk handlingsplan for naturmangfold Meld. St.35(2023-2024) (regjeringen.no)
• Statlige planretningslinjer for samordnet bolig-, areal- og transportplanlegging (regjeringen.no)
• Statlige planretningslinjer for klima- og energiplanlegging og klimatilpasning (lovdata.no)
• Statlige planretningslinjer for differensiert forvaltning av strandsonen langs sjøen (regjeringen.no)
• Rikspolitiske retningslinjer for å styrke barn og unges interesser i planlegging (lovdata.no)

Regionale føringar 

• Fylkesstrategi for attraktive byar og tettstader 2023-2026 (mrfylke.no)
• Fylkesstrategi for klima miljø og energi 2023-2026 (mr.fylke.no)
• Fylkesplan for Møre og Romsdal 2025 -2028 (mrfylke.no)
   

Overordna prinsipp for arealplanlegging i Vestnes kommune

1. Revurdere utbyggingsreserve avsett i gjeldande kommuneplan og eldre reguleringsplanar som ikkje lenger er i tråd med nasjonal arealpolitikk, regionale føringar eller ønska utvikling av areal og samfunn.
2. Ha eit variert bustadtilbod og ledige tomter i alle bygdesentra, men prioritere transformasjon og fortetting.
3. Prioritere varierte, trygge og aldersvenlege bumiljø med gode løysingar for kollektivtransport, gange og sykkel.
4. Sikre alle bustadområde tilgang til natur- og friluftsområde og arbeide for å binde saman eit nett av turvegar i kommunen.
5. Stille krav til variasjon i bustadtypar og storleikar ved større utbyggingar.
6. Sikre kulturminne og kulturmiljø for å ta vare på stadskvalitet, identitet og særpreg.
7. Sikre etablering av møteplassar i samband med større utbyggingsprosjekt og publikumsbygg.
8. Vestnes sentrum er prioritert handelssentrum, kollektivknutepunkt og sosial møteplass. Planlegging skal legge til rette for ein kombinasjon av arbeidsplassar, bustader, servicetilbod og handel i sentrumskjernen.
9. Ivareta og vidareutvikle etablerte næringsområde.
10. Legge til rette for næringsareal knytt til hovudvegnettet og traséar for kollektivtransport.
11. Sikre kommunal infrastruktur og legge til rette for utvikling av gode kommunikasjonsmoglegheiter til byane.
12. Sikre parkering ved viktige kollektivknutepunkt.
13. Sikre areal til berekraftig utvikling av landbruk, skogbruk og havbruk.
14. Verne om areal som er viktige for friluftsliv og naturmangfald, samt karbonrike areal, slik at kvalitet og evne til karbonlagring, klimatilpassing og andre økosystemtenester oppretthaldast.
15. Sikre at spreidd busetnad ikkje punkterer samanhengande grøntområde, landbruksområde eller blågrøne korridorar.
16. Sikre areal til blågrøne strukturar i utviklinga av nye og eksisterande bumiljø for å motverke flaum og skadar knytt til overvatn.